Stór hópferðabíll er gjörónýtur eftir að eldur kviknaði í honum á Gjábakkavegi laust eftir klukkan 11 í morgun.
Hátt í þrjátíu manns voru í rútunni og sluppu allir út án meiðsla. Neyðarlínan fékk boð um eldinn klukkan 11:07 og sendu Brunavarnir Árnessýslu mannskap á vettvang frá Laugarvatni og Selfossi.
Slökkvistarf gekk vel fyrir sig en mikill eldur var í rútunni þegar að var komið. Einnig kviknaði eldur í gróðri í vegkantinum og slökkviliðsmenn þurftu einnig að bregðast við olíuleka frá rútunni en það gekk vel og varð minniháttar mengun af völdum olíunnar en rútan var stödd innan þjóðgarðsins á Þingvöllum.