Allir kláruðu gönguna áfallalaust

Nemendur í útivistaráfanga við Fjölbrautaskóla Suðurlands gengu yfir Fimmvörðuháls um síðustu helgi. Í hópnum voru 29 nemendur og þrír kennarar.

Fyrri daginn var gengið yfir Fimmvörðuháls og gist í Básum, en seinni daginn var gengið og vaðið inn Merkurker áður en haldið var heim. Aðstæður á Fimmvörðuhálsi voru nokkuð krefjandi, þoka og rigning, en hópurinn stóð sig vel og allir kláruðu gönguna áfallalaust. Þessi leið er 25 km löng og tók um 10 klst að ganga með nokkrum stoppum.

Matvælabraut FSu undir stjórn Guðríðar Egilsdóttur sá um að útbúa kvöldmat sem var framreiddur í Básum. Þar voru á boðstólnum úrbeinuð lambalæri, piparsósa, kartöflusalat og grænmetisalat með dressingu. Allt smakkaðist dásamlega og endurnærðust göngumenn á mettíma.

Á yfirstandandi haustönn eru kenndir tveir útivistaráfangar við Fjölbrautaskóla Suðurlands sem eru meðal þeirra fjölbreyttu valáfanga í íþróttum sem boðið eru upp á við skólann. Annar áfanginn snýst um að fara í nokkrar stuttar göngur á fjöll í nágrenni skólans, hinn áfanginn snýst um fyrrnefnda göngu yfir Fimmvörðuháls.

Kennarar íþróttagreina við FSu eru Sverrir Ingibjartsson, Ásdís Björg Ingvarsdóttir og Magnús Tryggvason.