Einu meirihlutaviðræðurnar hjá sunnlenskum sveitarfélögum eftir kosningarnar síðastliðinn laugardag eru í Hveragerðisbæ – og þær eru ekki formlega hafnar. Þar féll meirihluti Okkar Hveragerðis og Framsóknar.
Sjálfstæðisflokkurinn bætti við sig manni og fékk þrjá bæjarfulltrúa, Okkar Hveragerði missti einn mann og fékk tvo bæjarfulltrúa og B-listinn missti sömuleiðis einn mann og fékk einn fulltrúa og Samfylkingin og óflokksbundnir fengu einn fulltrúa. Það eru því ýmsir kostir í stöðunni hvað varðar meirihlutamyndun.
Oddvitar framboðanna vildu lítið láta hafa eftir sér en Marta Rut Ólafsdóttir, oddviti Framsóknar, sagði í samtali við sunnlenska.is að óformlegar þreifingar hafi verið á alla kanta en ekki sé komin skýr mynd á framhaldið. Ingimar Guðmundsson, oddviti Sjálfstæðisflokksins, tók undir þetta og bætti við að hlutirnir myndu væntanlega skýrast þegar nær dregur helgi.
Lárus Jónsson, oddviti Okkar Hveragerðis, segir stöðuna eftir kosningar áhugaverða og kalli fyrst og fremst á yfirvegun og ábyrgð af hálfu allra fulltrúa. Hann segir fólk eiga í góðu samtali og verið sé að máta hvar flestir snertifletir liggja og ekkert sé útilokað í þeirri vinnu.
„Okkar nálgun í Okkar Hveragerði er skýr: Við munum gera allt sem í okkar valdi stendur til þess að félagshyggju- og umbótaöfl haldi velli og áfram verði tryggður stöðugleiki og ábyrgur rekstur í bænum,“ segir Lárus í samtali við sunnlenska.is. „Þegar rýnt er í tölurnar sést að það er ekki skýrt ákall um stefnubreytingu hjá bæjarbúum, enda munaði á endanum aðeins 15 atkvæðum á núverandi meirihluta annars vegar og D-listanum hins vegar. Við lesum úr þessu fyrst og fremst ákall eftir breiðri samstöðu um stjórn bæjarins og hagsmuni íbúa,“ bætir Lárus við.