Aðfaranótt þriðjudags fór heimasíða með stefnuskrám flokkanna í Árborg í loftið. Þar má sjá stefnuskrár flokkanna fjögurra sem bjóða fram til sveitarstjórnarkosninga þann 16. maí næstkomandi.
Forsprakki heimasíðunnar er frumkvöðullinn Ísak Eldjárn, sem var orðinn langþreyttur á því að stefnuskrár flokkanna væru ekki aðgengilegar á eina og sama staðnum.
„Þetta í raun æxlaðist þannig að ég var að skoða Íbúar á Selfossi á Facebook, rétt fyrir miðnætti á mánudaginn. Ég sá einhverja þar vera að spyrja um stefnumál hjá flokkunum sem bjóða sig fram og út frá því spunnust umræður,“ segir Ísak í samtali við sunnlenska.is
„Ég hugsaði – og ég hef hugsað þetta áður – afhverju er ekki bara hægt að sjá þetta allt á sama stað, því að ég nenni ekki að fara inn á fjórar mismunandi heimasíður til að leita. Þannig að ég prófaði bara að setja upp síðu með stefnuskrá allra flokkana í Árborg.“
Bæði kjósendur og frambjóðendur þakklátir
Ísak, sem er vanur að vinna markaðsefni fyrir fyrirtæki, var ekki lengi að setja heimasíðuna í loftið. Einum og hálfum tíma eftir að hann fékk hugmyndina var síðan orðin að veruleika. Um 2.000 manns hafa heimsótt heimasíðuna síðan hún fór í loftið.
„Ég hef fengið mörg skilaboð frá fólki, meðal annars frá frambjóðendum flokkanna, þar sem fólk er að þakka mér fyrir síðuna. Fólk virðist kunna að meta það að hafa stefnuskrárnar allar aðgengilegar á einum stað.“
Ísak er nú þegar búinn að fá fyrirspurnir frá öðrum sveitarfélögum um sambærilegar síður. „Það er svo sem lítið mál að gera eina svona heimasíðu í sjálfboðavinnu fyrir eitt sveitarfélag, en ef það er áhugi að bæta við fleiri stefnum hjá flokkum í öðrum sveitarfélögum þá þarf ég kannski að útbúa eitthvað sanngjarnt verð fyrir það,“ segir Ísak ennfremur.