Alexander Brynjarsson frá Hótel Geysi sigraði í Sjávarréttakeppni NORA Seafood sem fram fór um síðustu helgi, samhliða keppninni um Kokk ársins.
Alexander þótti sýna framúrskarandi færni í meðhöndlun sjávarfangs í þessari nýju keppni. Í öðru sæti varð Aron Elvar Bjarkason, einnig frá Hótel Geysi.
Sunnlendingar áttu fleiri fulltrúa í keppni helgarinnar; Hugi Rafn Stefánsson frá Black Sand Hótel í Ölfusi varð í 2. sæti í keppninni Kokkur ársins, Monica Daniela Panait frá Hótel Geysi keppti í keppninni Grænmetiskokkur ársins og Claudio Sohan frá Hótel Selfoss keppti í sjávarréttakeppninni.
Keppnin um Kokk ársins var haldin í þrítugasta sinn í ár og markar það mikilvæg tímamót í íslenskri matreiðslu. Frá upphafi hefur Bjarki Hilmarsson, yfirmatreiðslumeistari á Hótel Geysi, haft umsjón með keppninni og gegnt lykilhlutverki í þróun hennar og uppbyggingu.
Bjarki segir keppnina hafa þróast mikið í gegnum árin. „Það er ótrúlegt að sjá hversu langt þessi keppni hefur komið á þessum 30 árum. Gæðin aukast með hverju árinu og keppendur leggja sífellt meira í undirbúning og framsetningu. Það er ljóst að framtíð íslenskrar matreiðslu er björt.“
