Þungarokkshátíðin HELLFOSS verður haldin í annað sinn dagana 5.-6. febrúar 2027, á Sviðinu í miðbæ Selfoss. Uppselt var á hátíðina í fyrra og komust færri að en vildu.
Selfyssingurinn Rúnar Hroði Geirmundsson hefur veg og vanda að hátíðinni en sjálfur er hann söngvarinn í þungarokkshljómsveitinni Une Misère, sem kemur einmitt fram á hátíðinni.
Boltinn byrjaði að rúlla á fótboltamóti
En hvernig kom það til að þungarokkari ákveður að halda hátíð sem þessa í hnakkabænum Selfoss? „Það hefur nú alltaf verið draumur að halda tónleikahátíð en ég hef bara ekki haft tímann eða burði til þess. Það var ekki fyrr en ég var nýfluttur á Selfoss fyrir tveimur árum og tók þátt í firmamóti í fótbolta að hjólin fóru að snúast,“ segir Rúnar í samtali við sunnlenska.is.
Rúnar var fenginn til liðs við fótboltalið sem Davíð Lúther Sigurðarson var í forsvari fyrir en Davíð Lúther rekur Sviðið og fleiri staði í miðbæ Selfoss.
„Seinna biður Davíð mig um að koma á fund og segir: „Langar þig ekki að halda þungarokkhátíð hérna? Ætli það sé hægt?“. Ég sagði já við báðum spurningunum og þarna kom upp nafnið HELLFOSS, sem var fullkomið. Þarna var ég nýkominn heim frá Frakklandi þar sem ég spilaði á HELLFEST, sem er ein stærsta þungarokkhátíð í heimi.“
400 mættu á hátíðina
HELLFOSS var haldin í fyrsta skipti í byrjun febrúar á þessu ári og tókst vonum framar.
„Við höfum grínast svolítið með það hvað þetta gekk vel. Það fór í raun ekkert úrskeiðis þegar á hólminn var komið. Það fór auðvitað hellingur á hliðina í undirbúningnum, en ekki á hátíðinni sjálfri. Ljósamaður fannst til dæmis bara þegar tónleikarnir voru byrjaðir og ljósin í húsinu voru í uppfærslu þegar fyrsta bandið var að byrja.“
„Það mættu um 400 manns á hátíðina. Við seldum um 350 miða en ég þorði ekki að selja meira vegna takmarkana á fjölda í húsinu. En samtals voru um 60 listamenn yfir tvo daga, þannig það dreifðist nokkuð vel. Það var sem sagt uppselt og komust færri að en vildu.“
Langaði að rífa upp andann á erfiðasta tíma ársins
Eins og síðast verður HELLFOSS verður haldin aftur í byrjun febrúar. Tímasetningin er engin tilviljun.
„Það er ekkert í gangi á þessum tíma. Ekki það að ég sé hræddur við samkeppni, alls ekki, ég þrífst í henni. En í byrjun febrúar er búið að vera myrkur lengi, það er kalt, þunglyndi skýst upp, því miður og jólin eru búin. Þannig mig langar að rífa upp andann fyrir rokkarana og tónlistarunnendur og fá eitthvað til að hlakka til, svona yfir erfiðasta tíma ársins. Einnig sögðu mér allir að þetta væri vonlaus tími til þess að selja miða og vonlaus tími til þess að halda tónleika. Þá verð ég að gera það og gefa puttann. Ég er vanur að synda á móti straumnum eins og villtur lax með þrjá spúna í rassgatinu,“ segir Rúnar og hlær.
Friðsælir og snyrtilegir þungarokkarar
„Fólk á fyrst og fremst von á góðri stemningu þar sem þú finnur að þú ert öruggur, velkominn og svo verður auðvitað frábær tónlist. Þungarokkið er nefnilega sérstakt. Ég sagði á mörgum fundum í aðdraganda hátíðarinnar, trekk í trekk, að þeir sem stjórna staðnum ættu að slaka á dyravörslupælingum og spara sér peninginn.“
„Það er ALDREI vesen á þungarokkurum, þá meina ég aldrei. Þú gætir sleppt því að vera með öryggisgæslu, við sjáum um að halda friðinn innanbúðar. Það hefur til dæmis aldrei þurft að þrífa eins lítið á Sviðinu eftir tónleika, samt var stappað út að dyrum. Annars vil ég bara búa til stað og stund og vettvang þar sem allir ólíkir karakterar úr öllum öngum samfélagsins geta komið og verið þau sjálf, örugg og enginn að dæma, you do you.“
Uppstoppuð dýr, nornir og húðflúrari
Rúnar leitast eftir því að skapa hátíðarstemingu á HELLFOSS. „Ég prófaði það eftir fremsta megni í fyrra og það skotgekk upp. Handverkshúsið var að selja Carhartt föt í takmörkuðu upplagi sem voru merkt lógói hátíðarinnar. Það seldist allt upp til agna. Það var drengur að selja uppstoppuð dýr og hauskúpur. Nornir með varning og allskonar handverk. Einnig var húðflúrari sem flúraði mann og annan. Úr skapaðist hátíðarstemmari og ég vil stækka þennan anga í miðbænum, hafa meira að gera fyrir alla og vonandi þá meira sem er aðgengilegt þeim sem hafa ekki miða.“
„Úti á Brúartorgi voru olíutunnur sem eldur logaði úr statt og stöðugt. Í mathöllinni, á veitingastaðnum Kröstí, var HELLFOSS hamborgarinn, kolsvartur og látið var vel af honum,“ bætir Rúnar við. Þess má geta að miðasala hófst í síðustu viku og hefur farið vel af stað. Fólk er hvatt til að tryggja sér miða í tíma þar sem allar líkur er á að það seljist upp á hátíðina eins og síðast.
Þarf mikla tónlistargáfu til að skilja þungarokk
En hvað er það sem er svona heillandi við þungarokkið? „Fyrir mér er þungarokk ein af endastöðvum tónlistar. Tónlistargáfur sem þarf til að skilja þungarokk, eru heilmiklar. Senan er svo falleg, það eru allir góðir við alla, ef einhver dettur, þá eru tíu manns búnir að stökkva og hjálpa, ef það brotnar glas, þá er búið að græja það áður en starfsmaður kemur. Svona eru þungarokkararnir, ekkert vesen.“
„Tónlistarlega er mikið í gangi og þarf allt að ganga upp til að úr verði vönduð tónlist, svo getur hún líka verið ekkert vönduð og samt verið geggjuð, svo lengi sem tónlistarmennirnir bera þann swagger að geta það, hafa þetta hrátt og lélegt, þannig að það fari í hring og verði geggjað. Það er eiginlega erfiðara.“
„Fyrir mig persónulega sem söngvara þá elska ég þungarokkið því það er eini tíminn sem ég er fyllilega 100% ég. Ég sem er þarna inni, beislaður alla daga og fæ algjört frelsi. Það er erfitt að öskra, miklu erfiðara en að syngja, þar sem ég kann bæði og get fullyrt þetta. Að sjá einhvern öskra textana þína og segja þér eftir tónleika hvað tónlistin þín gerir mikið fyrir þá manneskju í daglegu lífi er alveg magnað.“
Mikill fjöldi sem heimsækir Selfoss vegna hátíðarinnar
Rúnar segir að það felist mikil viðskiptatækifæri í hátíð sem þessari. „Mig dreymir um að gera meira svona og í samvinnu við fleiri. Ég er aðfluttur maníupúki, samt sveitamaður og ég tengi við smærri bæjarfélög – þó þetta sé risastórt fyrir mér. Þarna koma um 400 manns að spila, þú getur nánast tvöfaldað þá tölu með fylgdarliði þeirra. Margir koma og eiga ekki miða.“
„Þarna eru svakalega margir að koma í bæinn okkar og mikil viðskiptatækifæri fyrir alla í bænum. Þá erum við að tala um verslanir, gistingu, þjónustu, og fleira. Ég vona að þessi hátíð komi til með að vera eitthvað sem fyrirtæki hlakka til að fá hvert ár og við hjálpumst að við að stækka.“
„Annars langar mig bara að koma fram þakklæti til allra þeirra sem standa að baki Sviðsins, Miðbars og Miðbæjar Selfoss, því það hefur aldrei verið neitt vesen, ekkert, bara lausnir og þjónustulund, gjafmildi og gleði. Ég elska það. Ég elska Selfoss!“ segir Rúnar að lokum.
Hægt er að nálgast miða á HELLFOSS inn á tix.is.
