Selfyssingurinn Aldís Arnardóttir hefur verið ráðin framkvæmdastjóri Kalon og hefur þegar hafið störf. Ráðningin kemur á sama tíma og aukin áhersla er lögð á að þróa íþrótta- og heilsusvið Icepharma undir merkjum Kalon.
Aldís er með yfir 14 ára reynslu af rekstri, sölu og þjónustu hjá 66°Norður. Þar gegndi hún ýmsum stjórnendastörfum og bar meðal annars ábyrgð á verslunar- og sölustarfsemi félagsins innanlands og erlendis. Á þeim tíma leiddi hún fjölbreytt verkefni á sviði rekstrar, þjónustu, mannauðsmála og stefnumótunar.
„Kalon er leiðandi afl í að skapa magnandi heilsu og það eru spennandi tímar fram undan hjá fyrirtækinu. Ég tek við starfsemi sem byggir á sterkum grunni, góðum vörumerkjum og reynslumiklu starfsfólki sem þekkir markaðinn vel. Ég hlakka til að vinna með teyminu að áframhaldandi uppbyggingu og þróa starfsemina til framtíðar,“ segir Aldís í tilkynningu frá félaginu.
Kalon sameinar heildsölu Icepharma á sviði heilsu og íþrótta og fer með umboð fyrir fjölda þekktra vörumerkja, þar á meðal Nike, NOW, MUNA, Speedo, Curaprox og Sonett.