Ágreiningur um ákvörðun innanríkisráðherra

Á fundi stéttarfélaganna með þingmönnum Suðurkjördæmis á Eyrarbakka á miðvikudagskvöld kom sterkt fram að ákvörðun ráðherra í fangelsismálum félli í grýttan jarðveg hjá Sunnlendingum.

„Þingmenn töldu ákvörðun ráðherrans ekki eiga sér lagaheimild og eins og einn þingmaðurinn orðaði það: hættum þessu Hólmsheiðarbulli og byggjum við á Litla Hrauni,“ segir Halldóra Sigríður Sveinsdóttir, formaður Bárunnar stéttarfélags.

Með fundinum voru stéttarfélögin á Suðurlandi að kalla eftir sameiginlegri stefnumótun þingmanna í atvinnumálum kjördæmisins . Töldu þingmenn að erfitt væri að vera með þverpólitíska stefnu í atvinnumálum og báðust undan því.

„Þingmenn sögðust treysta sér til að sameinast um einstaka mál eins og viðbyggingu við Litla Hraun, standa vörð um Heilbrigðisstofnun Suðurlands og Suðurlandsveg. Þingmenn hétu fundarmönnum því að beita sameiginlegum slagkrafti til þessara mála,“ segir Halldóra. Miklar umræður urðu um heildarstefnu í atvinnumálum, lélegu aðgengi að fjármagni og atvinnuleysi.

Að lokum kölluðu fundarmenn eftir stórskipahöfn í Þorlákshöfn, virkjunum samkvæmt rammaáætlun og mikil áhersla var lögð á að raforkan nýtist í heimabyggð.

„Eins og einn þingmaðurinn orðaði það „tími kjördæmispotara er ekki liðinn“ vonandi spyrnir það við þeirri þróun að þjónusta og uppbygging fari á höfuðborgarsvæðið,“ sagði Halldóra ennfremur.