Áfram unnið á óvissustigi

Ríkislögreglustjóri hefur ákveðið í samráði við lögreglustjórann á Hvolsvelli, Veðurstofu Íslands og Jarðvísindastofnun að viðhalda óvissustigi almannavarna á Mýrdalsjökli næstu tvær vikurnar.

Í dag var farið í vísindamannaflug á vegum almannavarnadeildar ríkislögreglustjóra yfir Mýrdalsjökul. Markmið flugsins var að afla upplýsinga ástand jökulsins og bera þær saman við upplýsingar sem aflað var í flugi þann 11. júlí síðastliðinn.

Eftir flugið í dag er ljóst að engar umtalsverðar breytingar hafa orðið á jöklinum. Leysingavatn er í dýpsta katlinum. Þetta vatn er eðlileg afleiðing sólbráðar af yfirborði jökulsins og stafar ekki af óvenjulegri jarðhitavirkni undir jöklinum.

Næstu tvær vikur verður reglulegt eftirlitsflug yfir jökulinn og fylgst vel með framvindunni.

Jafnframt er talið ástæðulaust að viðhalda bannsvæði á austurhluta Mýrdalsjökuls, en vakin er athygli á því að mikilar sprungumyndanir eru í suðausturhluta jökulsins.