Forsætisráðherra, mennta- og barnamálaráðherra og forseti Skáksambands Íslands undirrituðu í dag samning um 43 milljón króna styrk til 50 ára afmælishátíðar „einvígis aldarinnar“ í skák á Íslandi.
Meðal fyrirhugaðra viðburða er heimsmeistaramótið í Fischer-slembiskák. Margfaldur heimsmeistari í skák Magnus Carlsen og núverandi heimsmeistari í Fischer-slembiskák Wesley So hafa þegar tilkynnt þátttöku.
Auk heimsmeistaramótsins rennur styrkurinn til útbreiðslu á skák í skólum, alþjóðlegs kvennaskákmóts á ári kvennaskákar 2022 og til víðtækrar kynningar á einvígi aldarinnar. Mennta- og barnamálaráðuneytið hefur eftirlit með framkvæmd samningsins sem gildir til ársloka 2022.
Bobby Fischer og Boris Spassky háðu heimsmeistaraeinvígi í skák á Íslandi árið 1972. Viðburðurinn vakti heimsathygli þegar bestu skákmenn stórveldanna öttu kappi í Laugardalshöll á hápunkti kalda stríðsins. Einvígið kom Íslandi á kortið og er gjarnan kallað „einvígi aldarinnar“.
Bobby Fischer öðlaðist íslenskan ríkisborgararétt árið 2005 og flutti þá til Íslands. Hann lést í janúar árið 2008 og var jarðsettur í kyrrþey að eigin ósk í Laugardælakirkjugarði í Flóa. Fischersetrið á Selfossi var síðan opnað árið 2013, setur til minningar um Bobby Fischer.