Árleg byssusýning Veiðisafnsins á Stokkseyri verður haldin laugardaginn 14. og sunnudaginn 15. mars kl. 11 til 18. Þar verða m.a. kynntar og sýndar byssur frá Steinþóri Matthíasi Stefánssyni (1891–1967) sem nýlegar komu fram.
Að sögn Páls Reynissonar hjá Veiðisafninu er um að ræða einstakan fund í byssu- og iðnsögu Íslands og eru byssur Steinþórs engu líkar. Sonarsonur Steinþórs og nafni, Steinþór Stefánsson, hefur ánafnað Veiðisafninu samtals11 haglabyssum og eru níu af þeim smíðaðar af Steinþóri með ýmsum lásgerðum í 16ga. og 12ga. sem og ein ca. .410 minkabyssa.
Einnig verða kynntar skammbyssur sem Eiríkur Haraldsson rennismiður smíðaði, sjaldgæfar mjög og listasmíði en aðeins fimm eintök eru til. Nefndi hann þær Þrumur og eru þær í cal. .357Mag., nákvæm eftirgerð af Colt SAA.
Félagar úr Skotíþróttafélagi Kópavogs mæta og sýna mikið úrval skotvopna. Má þar nefna riffil og fylgihluti frá Jóni Þór Sigurðssyni Evrópumeistara í riffilskotfimi. Jóhann Vilhjálmsson byssusmiður verður einnig með kynningu á byssu- og hnífasmíði sinni.
Einnig má nefna byssur frá Jóni Björnssyni – Drífurnar frá Dalvík – og byssur frá Jóni Þorsteinssyni frá Ólafsfirði, sem einnig eru til sýnis.
Heimasíða Veiðisafnsins verður uppfærð samhliða byssusýnungunni þann 14. mars og má lesa þar um þessar byssur og byssusmiði.
