Aðalvinningurinn fór á Selfoss

Frá afhendingu aðalvinningsins. (F.h.) Guðlaug B. Guðjónsdóttir framkvæmdastjóri Krabbameinsfélags höfuðborgarsvæðisins, Benný Ósk Harðardóttir sölustjóri hjá Brimborg, vinningshafinn Sonja Eyfjörð Skjaldardóttir og eiginmaður hennar Matthías Bjarnason.

Sonja Eyfjörð Skjaldardóttir á Selfossi, heppinn greiðandi miða í jólahappdrætti Krabbameins­félagsins 2018, fékk nýlega afhentan nýjan sjálfskiptan Peugeot 3008 Allure, að andvirði um fjögurra og hálfrar milljóna króna.

Sonja var ekki alveg á því að trúa þessu þegar hringt var í hana til að tilkynna henni um vinninginn. Sonja og eiginmaður hennar, Matthías Bjarnason, voru á ferðalagi erlendis síðasta sumar og leigðu þar bíl. Svo skemmtilega vill til að bílaleigubíllinn var Peugeot 3008 og hjónin höfðu einmitt á orði í ferðinni hvað þau væru hrifin af þessum bíl. Þetta er í fyrsta skipti sem þau eignast nýjan bíl en vinningurinn var einn af 286 skattfrjálsum vinningum í happdrætti Krabbameinsfélagsins.

Fjórðungur vinninganna á Suðurland
Það er líka skemmtilegt að segja frá því að greiðendur miða í jólahappdrættinu á Suðurlandi voru mjög heppnir í útdrættinum, en þeir voru um fjórðungur vinningshafa.

Tekjum af happdrætti Krabbameinsfélagsins hefur fyrst og fremst verið varið til fræðslu um krabbamein og krabbameins­varnir, útgáfu fræðslurita og stuðnings við krabbameinssjúklinga. Stuðningur við happdrættið hefur gert félaginu kleift að halda uppi öflugu fræðslustarfi í þágu þjóðarinnar. Krabbameinsfélag höfuðborgarsvæðisins hefur umsjón með framkvæmd og rekstri happ­drættis Krabbameinsfélagsins.

Krabbameinsfélagið vill þakka landsmönnum fyrir góðan stuðning í jólahappdrættinu, óskar öllum vinningshöfum innilega til hamingju með vinningana og starfsfólki bílaumboðins Brimborgar fyrir sérlega gott samstarf.