Lögreglan á Suðurlandi kærði 28 ökumenn fyrir að aka of hratt í umdæminu í liðinni viku. Sá sem hraðast ók var stöðvaður á Þjóðvegi 1 við Þorgeirsstaði í Lóni en hann var á 149 km/klst hraða þar sem leyfður hámarkshraði er 90 km/klst.
Ökumaðurinn lauk máli sínu með greiðslu sektar að upphæð 210 þúsund krónur og sviptingu ökuréttar í einn mánuð. Þarna var á ferðinni erlendur ferðamaður og segir lögreglan að þetta hafi reynst heldur snubbóttur endir á annars skemmtilegri heimsókn til Íslands.
Annar ökumaður, íslenskur, var stöðvaður á 137 km/klst hraða á Biskupstungnabraut norðan við Borg en þar er leyfður 70 km/klst hámarkshraði. Málið fer til ákæruvaldsins til afgreiðslu en varðar 180 þúsund króna sekt og tveggja mánaða sviptingu.