Félagsfundur Á-listans í Rangárþingi ytra, hreyfingu áhugafólks um sveitarstjórnarmál, samþykkti einróma í morgun tillögu uppstillingarnefndar um framboðslista fyrir komandi sveitarstjórnarkosningar.
Í efstu fjórum sætum listans eru þau Eggert Valur Guðmundsson, Margrét Harpa Guðsteinsdóttir, Erla Sigríður Sigurðardóttir og Viðar Már Þorsteinsson, sem öll hafa víðtæka reynslu af stjórnsýslu sveitarfélagsins, bæði úr nefndum og sveitarstjórn.
Í fimmta sæti listans er nýr frambjóðandi, Eiríkur Vilhelm Sigurðarson, sem hefur mikla þekkingu á starfsemi sveitarfélagsins. Eiríkur starfaði um árabil sem markaðs- og kynningarfulltrúi Rangárþings ytra og hefur auk þess verið virkur í félagsstarfi, m.a. sem formaður Hestamannafélagsins Geysis. Ef Á-listinn heldur meirihluta eftir kosningar mun Eiríkur Vilhelm verða ráðinn sveitarstjóri.
„Frá upphafi hefur Á-listinn lagt áherslu á að bjóða fram fólk sem er virkt í samfélaginu og hefur fjölbreytta reynslu úr atvinnulífi og félagsstarfi, bæði úr þéttbýli og dreifbýli. Frambjóðendur eiga það sameiginlegt að vilja vinna saman að uppbyggingu og bættum lífsgæðum íbúa Rangárþings ytra,“ segir í tilkynningu frá framboðinu. „Frambjóðendur endurspegla áherslur Á-listans um fjölbreyttan bakgrunn og góða tengingu við samfélagið og jafnvægi er á milli búsetu í þéttbýli og dreifbýli.“
Á-listinn var stofnaður árið 2010 og er óháður stjórnmálaflokkum á landsvísu. Hann fer nú með meirihluta í sveitarstjórn.
Framboðslisti Á-listans 2026:
1. Eggert Valur Guðmundsson, sjálfstætt starfandi og oddviti.
2. Margrét Harpa Guðsteinsdóttir, bóndi og sveitarstjórnarfulltrúi.
3. Erla Sigríður Sigurðardóttir, sjúkraflutningamaður með stjórnunarmenntun.
4. Viðar Már Þorsteinsson, tæknifulltrúi og sveitarstjórnarfulltrúi.
5. Eiríkur Vilhelm Sigurðarson, verksmiðjustjóri og sveitarstjóraefni.
6. Guðbjörg Snorradóttir, viðurkenndur bókari og þroskaþjálfi.
7. Þórunn Dís Þórunnardóttir, útungunarstjóri og sveitarstjórnarfulltrúi.
8. Gunnar Aron Ólason, upplýsingafulltrúi.
9. Anna Sóley Kjeld, í fæðingarorlofi.
10. Berglind Kristinsdóttir, verslunareigandi.
11. Daníel Freyr Steinarsson, verktaki og slökkviliðsmaður
12. Auður Erla Logadóttir, kennari og knattspyrnuþjálfari.
13. Gabríel Snær Ólafsson, pípulagninganemi.
14. Pálína S. Kristinsdóttir, kaupsýslukona.