Á-listinn í Rangárþingi ytra hefur ákveðið að bjóða fram lista í sveitarstjórnarkosningum 16. maí 2026 og er það í fimmta sinn sem listinn býður fram.
Listinn fékk hreinan meirihluta í kosningunum árið 2022 og í tilkynningu frá Á-listanum segir að fulltrúar listans hafi á kjörtímabilinu fundið fyrir sterkum meðbyr og hvatningu íbúa og atvinnulífs um að halda áfram góðu uppbyggingarstarfi í sveitarfélaginu, m.a. með markvissri uppbyggingu skólastofnana og íþróttaaðstöðu.
„Á-listinn mun ekki skorast undan ábyrgð og vill því halda áfram að leiða sveitarfélagið í gegnum mesta framkvæmdaskeið þess frá upphafi. Markmiðið er einfalt – að halda áfram að byggja upp öflugt sveitarfélag þar sem fólk vill búa, starfa og ala upp börn,“ segir í tilkynningunni.
Á-listinn var stofnaður snemma árs 2010 sem listi áhugafólks um sveitarstjórnarmál í Rangárþingi ytra. Frá upphafi hefur listinn lagt áherslu á að blanda ekki flokkapólitík inn í sveitarstjórnarmálin en leggja fremur áherslu á að tefla fram lausnamiðuðu fólki úr öllum stéttum samfélagsins sem brennur fyrir málefnum sveitarfélagsins. Þessar áherslur og opin stjórnsýsla, með miklu upplýsingaflæði til íbúa, hafa verið rauður þráður í öllu starfi listans frá upphafi.