Lögreglan á Suðurlandi stöðvaði í gærkvöldi erlendan ferðamann á Mýrdalssandi þar sem hann ók á hátt í 130 km/klst hraða.
Þegar lögreglumaður var að boða ökumann yfir í lögreglubifreiðina veitti hann því athygli að í aftursæti bifreiðarinnar sátu þrír farþegar og kom í ljós að einn þeirra sat undir 3 ára barni og barnið því laust í bifreiðinni.
Fékk ökumaður væna sekt fyrir hraðaksturinn ásamt því að foreldrarnir þurftu einnig að greiða sekt fyrir að vera ekki með barnið í viðeigandi barnabílsstól, sem þó var til staðar í bifreiðinni.
Ungmenni bræða bensíngjöfina
Nokkuð hefur verið um það í aðdraganda helgarinnar að ungir ökumenn á leið á Borgarfjörð eystra á hátíðina Bræðsluna hafa stigið heldur þungt á inngjöfina og verið stöðvaðir vegna hraðaksturs.
Sauðkindin leynist í háa grasinu
Þá hefur það aukist talsvert að ekið hefur verið á sauðfé í umdæminu og vill lögregla beina þeim tilmælum til ökumanna að virða hámarkshraða og hafa það í huga að sauðkindin er víða á beit í háu grasinu sem liggur víða hátt og þétt upp við vegaxlir á þjóðvegi 1.