Eftir hádegi í dag stöðvaði lögreglan á Selfossi ökumann bifhjóls á Suðurlandsvegi í Ölfusi en hann hafði ekið á 181 km/klst hraða framhjá radarmæli lögreglunnar.
Lögreglan stöðvaði manninn á vegarkafla á milli hraðaeftirlitsmyndavélanna tveggja í Ölfusinu. Bifhjólinu var ekið í vestur og sinnti maðurinn strax stöðvunarmerkjum lögreglu.
Maðurinn var boðaður á lögreglustöð þar sem hann var yfirheyrður og að því loknu sviptur ökurétti til bráðabirgða. Hald var lagt á bifhjólið á meðan rannsókn stendur yfir og í framhaldi verður tekin ákvörðun hvort gerð verði krafa um upptöku á bifhjólinu.