Ný stjórn var kosin á aðalfundi Markaðsstofu Suðurlands sem haldinn var á Hótel Heklu á dögunum. Aðalfundurinn var vel sóttur en að honum loknum hélt markaðsstofan málþing og árshátíð.
Ása Valdís Árnadóttir, formaður stjórnar, opnaði aðalfundinn og Dagný H. Jóhannsdóttir, framkvæmdastjóri MSS, fór síðan yfir verkefni sl. árs og ársreikning 2016. Sú nýbreytni var að núna að óskað var eftir framboðum til stjórnarsetu fyrir 2017/2018 fyrir hönd Ferðamálasamtaka Suðurlands. Aðeins tveir buðu sig fram sem aðalmenn, einn sem varamaður og verða þeir því sjálfkjörnir. Stjórnarmennirnir Þórður Freyr Sigurðsson, Ása Valdís Árnadóttir og Magnús Bragason gáfu ekki kost á sér í til áframhaldandi setu og eru þeim þökkuð vel unnin störf.
Nýja stjórn skipa Björg Árnadóttir, Visit South Iceland ehf, Sigurlaug Gissurardóttir, Ferðamálafélagi Austur-Skaftafellssýslu, Gunnar Þorgeirsson, Samtökum sunnlenskra sveitarfélaga, Sólrún Helga Guðmundsdóttir, Samtökum sunnlenskra sveitarfélaga, Bjarni Freyr Báruson, Ferðamálasamtökum Suðurlands og Elfa Dögg Þórðardóttir, Ferðamálasamtökum Suðurlands. Varamenn í stjórn eru þau Katrín Sigurðardóttir, Visit South Iceland ehf, Bjarni Guðmundsson, Samtökum sunnlenskra sveitarfélaga, Sigurður Rafn Hilmarsson, Ferðamálasamtökum Suðurlands og Anna María Ragnarsdóttir, Ferðamálafélagi Austur-Skaftafellssýslu.
Í kjölfar aðalfundar var síðan haldið málþing undir yfirskriftinni Er eitthvað að gerast?. Dagný H. Jóhannsdóttir opnaði málþingið. Málþingið var afar vel sótt og voru flutt áhugaverð erindi frá Arnheiði Jóhannsdóttur frá Markaðsstofu Norðurlands, Ingu Hlín Pálsdóttur frá Íslandsstofu, Þóri Erlingdssyni frá Háskólanum á Hólum, Ými Björgvini Arthúrssyni frá Magical Iceland og Sigríður Hulda Jónsdóttir lokaði síðan málþinginu með skemmtilegu erindi um gleðina í starfi.
Eftir málþingið var síðan farið í örferð um hluta uppsveitanna þar sem Ásborg Arnþórsdóttir, ferðamálafulltrúi, sagði frá því helsta sem er að gerast þar um þessar mundir og gestir kynntu sér ferðaþjónustu á svæðinu.
Um kvöldið var síðan mikið fjör á árshátíð þar sem saman kom fólk úr ferðaþjónustu á Suðurlandi. Inga Hlín Pálsdóttir frá Íslandsstofu var heiðursgestur og hélt stutt erindi. Margrét Maack var veislustjóri og hélt uppi fjörinu þar til Jakob Björgvin og Magnús Kjartan tóku við og spiluðu fyrir dansi. Vel heppnaður dagur í alla staði.