Aðveituæð í Ölfusinu rifin

Þessa dagana vinnur Orkuveita Reykjavíkur að því að rífa syðsta hluta aðveituæðar hitaveitunnar sem liggur frá Hjalla í Ölfusi suður til Þorlákshafnar.

Ríflega þriggja kílómetra leggur úr aðveituæðinni verður rifinn en framkvæmdir hófust í byrjun nóvember og er gert ráð fyrir því að verkið taki um einn mánuð.

Pípan verður klippt niður í tólf metra langa búta og efnið flutt ýmist til förgunar eða endurvinnslu. Æðin var lögð árið 1979 en var tekin úr notkun 2008, þegar önnur nýrri leysti hana af hólmi. Undirstöður pípunnar verða einnig fjarlægðar og gengið frá sárum, sem þær skilja eftir.