Undirritun þjóðarsáttmála um læsi fór fram í barnaskólanum á Stokkseyri í gær. Menntamálaráðherra skrifaði undir ásamt fulltrúum Árborgar, Bláskógabyggðar, Flóahrepps, Hveragerðis, Ölfuss og Grímsnes- og Grafningshrepps.
Illugi Gunnarsson, mennta- og menningarmálaráðherra, ávarpaði samkomuna og ræddi um stefnu sína sem fram kemur í Hvítbók um umbætur í menntun. Ákveðið hefur verið að ráðuneytið og Menntamálastofnun beini kröftum sínum að því að auka lestrarfærni og læsi ungs fólks á Íslandi. Sveitarfélögin munu í samstarfi við menntamálayfirvöld vinna að því að a.m.k. 90% nemenda geti lesið sér til gagns árið 2018.
Ásta Stefánsdóttir, framkvæmdastjóri Sveitarfélagsins Árborgar, flutti ávarp þar sem hún sagði m.a. frá bókabæjarverkefni Árborgar, Hveragerðis og Ölfuss og mögulegar tengingar þess við vinnu skólanna með lestur. Þá minnti hún á barnabókahátíð bókabæjanna sem verður haldin á Selfossi um næstu helgi með veglegri dagskrá, þar sem börnum verður boðið að taka virkan þátt í skapa góðar minningar um bækur og lestur góðra bóka.
Þorsteinn Hjartarson, fræðslustjóri, kynnti stuttlega læsisverkefni leik- og grunnskóla í Árborg. Þessi verkefni eru að skila góðum árangri, svo sem með markvissri málörvun, sögu- og samræðustundum í leikskólunum og góðri vinnu í kringum læsisskimanir í grunnskólunum. Nú er svo komið að læsisverkefni grunnskólanna virkar sem hvatning til góðrar læsisvinnu í öllum bekkjum skólanna og inni á heimilum nemenda. Margir líta nú á lestrarþjálfun inni í bekk sem gæðastund.
Ingólfur Þórarinsson, tónlistarmaður, flutti lagið „Það er gott að lesa“ eftir Bubba Morthens með þátttöku leikskóla- og grunnskólabarna og annarra gesta. Í augum barnanna var þessi dagskrárliður hápunktur athafnarinnar enda tókst flutningurinn afar vel. Eftir athöfnina voru kaffiveitingar í boði Árborgar og Barnaskólans á Eyrarbakka og Stokkseyri.