Á dögunum fór ný vefsíða í loftið, visteyri.is, þar sem bæði er hægt að kaupa og selja notuð föt eða heimilismuni og fá sent um allt land. Á aðeins þremur vikum hafa 800 manns skráð sig á vefsíðuna. Hugmyndin að Visteyri spratt upp þegar stofnendur voru við nám erlendis og kynntust þar slíkum markaðstorgum og sáu í kjölfarið tækifæri til að opna sambærilega vefsíðu á Íslandi með það að markmiði að gera viðskipti með notaðar vörur einföld, þægileg og aðgengileg öllum.
Teymið á bakvið Visteyri er skipað þeim Vilborgu Ástu Árnadóttur, Elfu Rós Helgadóttur og Sigrúnu Dís Hauksdóttur. Markmið þeirra var að opna stafrænt markaðstorg þar sem hægt
væri að selja notaðar vörur á einfaldan hátt og versla eins og í hverri annarri netverslun.
„Það eina sem þarf að gera til að taka þátt er að stofna aðgang, en það er frítt og tekur enga stund, og svo getur þú byrjað að selja og kaupa. Notendur geta greitt fyrir vörur á öruggan hátt ásamt því að fá þær sendar um allt land. Þannig geta allir tekið þátt í hringrásarhagkerfi sem gengur út á að deila og endurnýta,“ segir Vilborg.
Húnsegir hugmyndina hafi sprottið upp þegar þær bjuggu í Kaupmannahöfn og nýttu sér svipuð markaðstorg þar til að kaupa og selja notaðar flíkur. Það hafi gert þeim kleift að versla á betra verði og á umhverfisvænni hátt. „Við sáum strax að svona markaðstorg vantaði á Íslandi og þá sérstaklega að bjóða upp á sendingu um allt land til að gera viðskipti með notað aðgengileg öllum óháð staðsetningu.”
Elfa Rós bætir við að það sé margt fleira framundan á Visteyri og þær séu rétt að byrja. „Við getum ekki beðið eftir að fá fólk inn til að hjálpa okkur að móta Visteyri og stuðla að hringrásarhagkerfi með notaðar vörur,” segir Elfa Rós.
Skráðu þig á visteyri.is í nokkrum einföldum skrefum og byrjaðu að selja og kaupa.