Landbúnaðarháskóli Íslands heldur sumardaginn fyrsta hátíðlegan að vanda og býður til veislu bæði á Reykjum og Hvanneyri. Löng hefð er fyrir hátíðarhöldunum á báðum stöðum.
Á Reykjum verða garðskálarnir opnaðir fyrir gesti og gangandi og verður sérstaklega haldið uppá 80 ára afmæli garðyrkjunáms á Íslandi.
Hátíðardagskrá hefst kl 13:30 að viðstöddum forseta Íslands. Húsin opna kl. 10 og er opið til kl 17. Hægt verður að skoða verkefni nemenda og versla glænýtt grænmeti. Skoða stærstu bananaplantekru Evrópu, kynnast býflugnarækt og gæða sér á ketilkaffi til að nefna nokkur dæmi. Dagskrá verður fyrir börnin og nóg um að vera allan daginn, andlitsmálun, grillaðar pylsur og börn fá að sá sínu eigin salati.
Allir velkomnir að koma og njóta.
Skeifudagssýning á Hvanneyri
Hestamannafélag nemenda LbhÍ, Grani býður svo til uppskeruhátíðar af öðru tagi en þar keppa nemendur sem stundað hafa hestafræðiáfanga við skólann um Morgunblaðsskeifuna og Gunnarsbikarinn. Hátíðin hefst í hestamiðstöðinni Mið-Fossum kl 13:00 og eru allir velkomnir að líta við og fylgjast með dagskrá. Nemendur sýna afrakstur vetrarins og vel valin sýningaratriði verða í boði. Að henni lokinni verður kaffisala í aðalbyggingu LbhÍ, Ásgarði á Hvanneyri og hið vinsæla folatollahappdrætti þar sem vinningar eru gjafabréf fyrir handhafa að leiða hryssu sína undir hina ýmsu stóðhesta og leggja grunninn að framtíðargæðingum.