Atvinnuvegaráðherra úthlutaði í dag úr Framkvæmdasjóði ferðamannastaða fyrir árið 2025. Samtals var úthlutað 553,2 milljónum króna úr sjóðnum og fara tæpar 52,9 milljónir til verkefna á Suðurlandi.
Alls hlutu 28 verkefni styrk úr sjóðnum en aðeins tvö þeirra eru á Suðurlandi. Í úthlutuninni að þessu sinni var lögð áhersla á minna sótt svæði og lengingu ferðatímabils. Tíu verkefni á Austurlandi hlutu styrk og fjögur á Vestfjörðum en fæstir erlendir ferðamenn gista á þessum landssvæðum.
Ragnar Atli Guðmundsson fékk tæplega 31,2 milljón króna styrk, annars vegar vegna hönnunarvinnu og hins vegar vegna bráðaaðgerða og merkinga til gróðurverndar í Reykjadal í Ölfusi. Hönnunin lýtur að áningarstöðum, fljótandi stígum og varanlegum stígum en markmið verkefnisins er að vernda viðkvæman jarðveg og gróður í Reykjadal með bættri stýringu og merkingum. Verkefnið afmarkast að svæðinu frá hliðinu norðan bílastæðisins og að baðsvæðinu. Ekki er verið að styrkja framkvæmdir sem tengjast rekstri á svæðinu.
Þá fékk Rangárþing ytra tæplega 21,8 milljón króna styrk til að vinna að frumdrögum hönnunar, deiliskipulags og lokahönnun á öryggisinnviðum í Sigöldugljúfri. Um er að ræða hönnun á varanlegu bílastæði, gönguleiðum, viðvörunar- og upplýsingaskiltum auk hugsanlegra lokana eða afmarkana sem kunna að vera nauðsynlegar. Markmið verkefnisins er að bæta aðgengi og öryggi við Sigöldugljúfur, sem sífellt fleiri ferðamenn eru að uppgötva sem áfangastað.
„Framkvæmdasjóður ferðamannastaða gegnir stóru hlutverki í uppbyggingu ferðaþjónustu í landinu,“ sagði Hanna Katrín Friðriksson atvinnuvegaráðherra af þessu tilefni. „Það er ánægjuefni að geta stutt svo mörg verðug og spennandi verkefni sem styrkja þessa mikilvægu atvinnugrein.“