Ljósheimar, nýtt hjúkrunarheimili við Þórishóla á Selfossi fyrir sextíu íbúa verður tilbúið til notkunar í byrjun mars. Heilbrigðisstofnun Suðurlands mun reka heimilið, ásamt 40 öðrum hjúkrunarrýmum sem eru við stofnunina á Selfossi.
Þegar nýja heimilið hefur opnað verða samtals 100 hjúkrunarrými í rekstri Heilbrigðisstofnunar Suðurlands. Heilbrigðisráðherra hefur ákveðið, að höfðu samráði við Sveitarfélagið Árborg að 40 af þessum 100 rýmum í rekstri HSU, verði tímabundið til ráðstöfunar fyrir íbúa af höfuðborgarsvæðinu sem bíða eftir hjúkrunarrými.
Í tilkynningu frá heilbriðisráðuneytinu segir að þrátt fyrir þetta leiði opnun nýja heimilisins til þess að hjúkrunarrýmum í Árborg fjölgar um 25, og uppfylli það þá þörf sem fyrir er á svæðinu. Nýja heimilið kemur í stað tveggja hjúkrunarheimila sem lögð voru af á Suðurlandi árið 2016, á Kumbaravogi og Blesastöðum.
Willum Þór Þórsson heilbrigðisráðherra segir afar ánægjulegt að opnun nýja hjúkrunarheimilisins í Árborg sé nú í sjónmáli. „Þetta verður mikilvæg og kærkomin viðbót fyrir íbúa Árborgar. Eins er það góður kostur við núverandi aðstæður að geta boðið öldruðum sem bíða eftir hjúkrunarrými á höfuðborgarsvæðinu upp á þennan valkost meðan skortur er á hjúkrunarrýmum í Reykjavík og nágrannasveitarfélögunum.“
Auglýst hefur verið eftir starfsfólki á nýja hjúkrunarheimilinu og gert ráð fyrir að fyrstu íbúarnir flytji þar inn þegar líður á marsmánuð. Á heimilinu eru fimm búsetueiningar fyrir 12 íbúa hver.
Hönnuðir hússins eru Urban arkitektar ehf. og LOOP architects aps. og fyrirtækið Eykt hefur annast framkvæmdirnar.