Landsvirkjun hefur samið við austurríska fyrirtækið Andritz Hydro GmbH um kaup á fjórum sátrum í Búrfellsstöð. Andritz Hydro mun sjá um hönnun, framleiðslu, afhendingu og hafa umsjón með uppsetningu. Verklok eru áætluð á fyrri hluta árs 2030.
Heildarkostnaður við þessi fjögur sáturskipti í Búrfellsstöð nemur um 2,3 milljörðum króna og eru kaup á sátrunum sjálfum stærsti hluti þeirrar upphæðar.
Búrfellsstöð hóf rekstur árið 1969 og sátur hennar voru fyrst endurnýjuð undir lok síðustu aldar. Sátur er kyrrstæður hluti vélarinnar þar sem rafmagnið myndast. Það umlykur rafalinn en snúningur hans framkallar rafstraum í spólum sátursins.
Skipt um öll sátur
Samkvæmt samningnum við Andritz Hydro verður skipt um fjögur sátur á næstu fjórum árum. Árið 2023 var skipt um fyrsta sátrið í þessari endurnýjunarlotu og öðru sátrinu verður komið fyrir í vetur, en á sínum tíma var samið við önnur fyrirtæki um þann áfanga. Vélar Búrfellsstöðvar eru alls sex talsins.
Landsvirkjun og Andritz Hydro eiga farsælt samstarf að baki því austurríska fyrirtækið hefur áður útvegað búnað fyrir t.d. Sultartangastöð, Búrfell II og Fljótsdalsstöð.