Stjórn Samtaka sunnlenskra sveitarfélaga samþykkti á fundi sínum í síðustu viku fyrri úthlutun styrkveitinga úr Uppbyggingarsjóði Suðurlands árið 2021.
Alls var úthlutað tæpum 37 milljónum króna til 74 verkefna. Sextán milljónum króna var úthlutað til 21 verkefnis í flokki atvinnuþróunar- og nýsköpunarverkefna og tæpri 21 milljón króna til 53 menningarverkefna. Alls bárust sjóðnum 67 umsóknir í flokki atvinnuþróunar- og nýsköpunarverkefna og 99 umsóknir í flokki menningarverkefna.
Jarðhitavatn að Grásteini fjölnýtt
Raföld hlaut hæsta styrkinn í flokki atvinnu og nýsköpunar, eina og hálfa milljón króna, fyrir verkefnið „Fjölnýting jarðvarma til orkuvinnslu í dreifbýli“. Markmið verkefnisins er að fjölnýta jarðhitavatn frá borholunni að Grásteini í Ölfusi fyrir orkuvinnslu, upphitun og iðnað, auk þess sem affallsvatn frá hitaveitunni er nýtt fyrir útiböð og fiskeldi. Gert er ráð fyrir að reynsla af fjölnýtingu að Grásteini verður nýtt fyrir önnur jarðhitasvæði á Suðurlandi.
Undirliggjandi minni Flóamanna rannsakað
Í flokki menningarverkefna hlutu tvö verkefni 900 þúsund króna styrk. Um er að ræða verkefnin „Sumartónleikar í Skálholtskirkju“ og „Undirliggjandi minni“.
Ólafur Sveinn Gíslason hlaut styrk fyrir verkið „Undirliggjandi minni“ en verkefnið fjallar um uppruna og hugarheim einstaklinga sem búsettir eru í Flóahreppi. Það eru staðbundnir og persónubundnir þræðir sem verður fylgt eftir í rannsóknum Ólafs og skoðað hvernig þeir endurspeglast í menningararfi svæðisins. Andrúmsloft og hugarfar staðarins mun birtast í samvinnu íbúa í Flóahreppi og atvinnuleikara sem verða virkjaðir í flutningi verksins. Um er að ræða þekkingarsköpun sem tekin verður til úrvinnslu í gegnum kvikmyndamiðilinn.
Markmið Sumartónleika í Skálholti er að stuðla að uppbyggingu sígildrar tónlistar á Íslandi, með áherslu á nýsköpun, á flutning tónlistar fyrri alda og á sögulega upplýstan flutning. Skálholtskirkja er rómuð fyrir hljómburð sinn og myndlist og Sumartónleikar mikilvægur þáttur í því að efla almennt menningarhlutverk Skálholts. Í ár verður einnig lögð sérstök áhersla á að kynna börn og ungmenni fyrir nýrri tónlist og verða því sérstakir tónleikar og viðburðir sniðnir fyrir fjölskyldur.
Lista yfir verkefni sem hlutu styrki má sjá hér.