Framkvæmdir standa nú yfir við um 4.000 fermetra nýbyggingu Reykjagarðs á Hellu. Um er að ræða umfangsmikla fjárfestingu sem áætlað er að geti numið allt að 2,8 milljörðum króna og mun uppbyggingin meðal annars leiða til þess að starfsemi sem nú fer fram á höfuðborgarsvæðinu flyst á Hellu.
Guðmundur Svavarsson, framkvæmdastjóri Reykjagarðs, segir uppbygginguna marka stórt skref í starfsemi fyrirtækisins og atvinnuuppbyggingu á svæðinu en fjárfestingin er með þeim umfangsmeiri sem einkafyrirtæki hefur ráðist í á síðustu áratugum í Rangárvallasýslu.
„Ekki verður hjá því komist að einhver verði röskun á starfsumhverfi okkar hér á Hellu á meðan á framkvæmdum stendur og biðjumst við velvirðingar á því. Enn er ástæða til að þakka íbúum og sveitarstjórnaryfirvöldum í Rangárþingi ytra velvild og samvinnu við að koma þessu öllu í kring. Slíkt er forsenda þess að unnt sé að ráðast í atvinnuuppbyggingu af þessari stærðargráðu og mikils metið,‟ segir Guðmundur.
25 stöðugildi flytjast af höfuðborgarsvæðinu
Nýbyggingin rís austan við núverandi húsnæði Reykjagarðs og verður tengd því með sérstakri tengibyggingu. Þar verður meðal annars komið fyrir hlutun, úrbeiningu, fullvinnslu, pökkun, frystingu, kælum og afgreiðslu auk úrgangs- og tæknirýma. Samhliða framkvæmdunum verður stór hluti vélbúnaðar endurnýjaður.
Til stendur að flytja starfsemi sem nú er rekin með um 25 stöðugildum á höfuðborgarsvæðinu yfir í nýja húsnæðið á Hellu. Þá verður sett upp ný vinnslulína til steikingar og frystingar en sú vinnsla fer í dag fram hjá SS á Hvolsvelli. Stefnt er að því að starfsemi í nýju vinnslunni hefjist um mitt ár 2027.
Aðalhönnuður hússins er Vigfús Halldórsson hjá Balsa ehf., byggingarstjóri er Þórður Smári Sverrisson hjá Verkmið ehf. og verkefnisstjórn af hálfu Reykjagarðs er í höndum Björns Stefánssonar hjá Gaddstöðum ehf. Þjótandi ehf. annast jarðvinnu við framkvæmdina og BM Vallá framleiðir og reisir steyptar einingar ásamt þakvirki frá Límtré Vírneti á Flúðum. Gert er ráð fyrir að aðilar af svæðinu annist og hafi umsjón með pípu- og raflögnum.
Vinnslu- og vélbúnaður kemur meðal annars frá MAREL, GEA, Foodmate og ATT og verður búnaðurinn í samræmi við nýjustu tækni í kjúklingavinnslu á heimsvísu.
Í heild starfa um 140 manns hjá Reykjagarði við eldi, ræktun, slátrun, úrvinnslu og sölu kjúklinga. Þar af eru um 100–110 störf í Rangárvallasýslu.