Heilbrigðisráðherra hefur úthlutað heilbrigðisstofnunum á landsbyggðinni rúmum 100 milljónum króna til tækjakaupa og af þeirri upphæð fara 20 milljónir til Heilbrigðisstofnunar Suðurlands.
Við fjárlagagerð ársins 2015 var ákveðið að auka tímabundið fjárveitingu til tækjakaupa á heilbrigðisstofnunum á landsbyggðinni.
Fénu hefur verið úthlutað að höfðu samráði við forstöðumenn viðkomandi stofnana sem gerðu ráðuneytinu grein fyrir þeim búnaði sem þeir teldu brýnast að kaupa, auk þess sem tillit var tekið til rekstrarumfangs viðkomandi stofnana.
Kristján Þór Júlíusson, heilbrigðisráðherra, segir þetta aukna framlag vegna tækjakaupa til heilbrigðisstofnana á landsbyggðinni ríma vel við þær áherslur sem lagðar voru þegar gerð var fjögurra ára áætlun 2014–2017 um aukin framlög til tækjakaupa á Landspítalanum og Sjúkrahúsinu á Akureyri.