Sveitarstjórn Bláskógabyggðar leggst gegn áformum ríkisstjórnarinnar sem birtast í fjármálaáætlun um samdrátt í framlögum til framhaldsskóla. Í áætluninni er lögð til lækkun framlaga bæði til rekstrar og fjárfestinga á hverju ári til ársins 2030.
„Framhaldsskólarnir tveir á svæðinu, Menntaskólinn að Laugarvatni og Fjölbrautaskóli Suðurlands, skipta miklu máli fyrir menntun ungmenna og undirbúning þeirra fyrir frekara nám eða þátttöku í atvinnulífinu og sveitarstjórn þykir ljóst að skólarnir búa þegar við þröngan fjárhag og að þeir megi ekki við því að framlög til þeirra dragist saman,“ sagði Ásta Stefánsdóttir, sveitarstjóri, í samtali við sunnlenska.is.
Fjallað var um málið á síðasta fundi sveitarstjórnar Bláskógabyggðar og samþykkti sveitarstjórnin ályktun þar sem hún leggur til að fallið verði frá fyrirhugaðri skerðingu.
„Á umliðnum árum hefur framhaldsskólunum verið gert að hagræða í rekstri og hafa þær hagræðingaraðgerðir þegar haft neikvæð áhrif. Viðbótar niðurskurður fjárframlaga mun bitna á námi framhaldsskólanema og koma niður á starfsumhverfi starfsmanna skólanna,“ segir meðal annars í ályktun sveitarstjórnar.