Spennir fyrir safnstöð Vaðölduvers er kominn á framkvæmdasvæðið eftir sjóflutning frá Portúgal til Íslands og landflutning frá Þorlákshöfn. Spennirinn er þyngsti farmur sem fluttur hefur verið um íslenska vegi.
Spennirinn vegur 190 tonn og ýmsir fylgihlutir hans eru 40 tonn til viðbótar. Heildarþyngd spennis, alls búnaðar og sérstaks flutningabíls nam 308 tonnum.
Flutningarnir gengu snurðulaust. ET þungaflutningar sáu um flutninginn og að lokinni löndun í Þorlákshöfn gekk bílferðin samkvæmt áætlun eftir umfangsmikinn undirbúnings Landsvirkjunar í samstarfi við Vegagerðina, ET þungaflutninga, lögreglu og fleiri samstarfsaðila.
Flutningur yfir Þjórsárbrú gekk vel
Sérstakt samráð var haft við Vegagerðina vegna flutnings yfir brýr á leiðinni. Fulltrúar Vegagerðarinnar fylgdu flutningnum þar til brúin yfir Þjórsá hafði verið þveruð, skömmu eftir klukkan sex um morguninn.
Spennirinn var fluttur á sérútbúnum fjölöxla þungaflutningavagni sem er hannaður til að bera mjög þungan farm og dreifa álaginu á marga öxla sem var lykilatriði í undirbúningi flutningsins, ekki síst við akstur yfir brýr. Áður en flutningurinn hófst hafði leiðin verið yfirfarin með tilliti til burðarþols, beygjuradíusa og annarra aðstæðna á vegum.