Reykholt í Bláskógabyggð fagnar 100 ára afmæli þann 20. maí næstkomandi. Í tilefni tímamótanna hafa verið gerð fræðsluskilti um sögu þorpsins og efnt verður til hátíðar í Reykholti á afmælisdaginn.
Hátíðardagskrá hefst kl. 16:00 á horninu þar sem Skólabraut/Sólbraut mætast. Söguskiltin verða afhjúpuð þar formlega og síðan boðið upp á afmælis-sögugöngu með leiðsögn og fróðleik um Reykholt, gengið upp að Reykholtshver, Reykholtsskóla og Aratungu. Við lok göngunnar verður boðið upp á veitingar í Aratungu og eru allir velkomnir.
Upphaf byggðar í Reykholti má rekja til þess að 20. maí 1926 gaf vinnumaðurinn Jón Halldórsson Biskupstungnahreppi land og fé fyrir barnaskóla sem byggður skyldi við Reykholtshver í landi Stóra-Fljóts. Engir mannabústaðir voru þá í Reykholtinu en bærinn á Stóra-Fljóti stóð í hæðinni rétt ofan við bæjarhúsin á Brautarhóli.
Nú eru hundrað ár liðin frá þessum gjafagjörningi og verður upphafsins minnst, sem og þeirra sem ruddu brautina, hófu garðyrkju og búskap í Reykholti, beisluðu Reykholtshver, lögðu vegi og lagnir um svæðið. Fyrstu býlin voru byggð 1929-1952. Á svæðinu myndaðist fljótlega gott mannlíf
og margir öflugir frumherjar komu að uppbyggingunni.
Reykholt hefur vaxið hratt undanfarin ár og þar blómstar mannlíf og menning. Í dag eru íbúar tæplega 500 talsins og sannkallað fjölmenningarsamfélag. Reykholt er öflugasta ylræktarsvæði landsins, þar sem heita vatnið er svo sannarlega lífæð samfélagsins. Þess má geta að fjórar af garðyrkjustöðvunum í Reykholti eru stærstar á sínu sviði; Friðheimar stærsta tómataræktunarstöðin, Espiflöt stærst í ræktun afskorinna blóma, Gufuhlíð stærst í gúrkuræktun, Jarðaberjaland stærst í framleiðslu jarðarberja og Kvistabær er stærsti skógarplöntuframleiðandi á Suðurlandi.