Þyrla Landhelgisgæslunnar sótti í dag mann sem slasaðist í sumarbústað við Þingvallavatn. Slæm færð var að slysstaðnum.
Björgunarfélag Árborgar var kallað út til þess að hjálpa sjúkraflutningamönnum við að komast á slysstaðinn. Svo fór að þyrla Landhelgisgæslunnar sótti hinn slasaða en björgunarsveitin aðstoðaði aðstandendur við að komast til Reykjavíkur.
Í tilkynningu frá Landsbjörgu kemur ekki fram hver tildrög slyssins voru, eða hver meiðsli mannsins eru.
Björgunarsveitir Slysavarnafélagsins Landsbjargar hafa víða verið að störfum í dag, yfirleitt vegna ófærðar. Meðal annars þurftu björgunarsveitir að aðstoða ökumenn á nokkrum föstum bílum á Mosfellsheiði og Þingvallavegi.