Þyrla Landhelgisgæslunnar TF-SYN fór um helgina til rjúpnaveiðieftirlits ásamt lögreglunni á Selfossi. Allir veiðimenn sem lögreglan ræddi við voru með sín mál í lagi.
Lögregluembættin í landinu annast eftirlit með rjúpnaskyttum meðan á veiðum stendur og nýtur til þess aðstoðar þyrlu Landhelgisgæslunnar.
Meðan á eftirlitinu stóð var óskað eftir aðstoð vegna óhapps sem varð í Haukadalsskógi. TF-SYN lenti við slysstað og kannaði þyrlulæknir meiðsl sem reyndust minniháttar.
Var þá eftirlitinu haldið áfram, lent var hjá veiðimönnum, farið yfir skotvopnaleyfi þeirra, byssur og skotfæri. Voru allir með sín mál í lagi.
Á heimasíðu Gæslunnar kemur fram að eftirlit sem þetta sé fellt inn í annað eftirlits- og æfingaflug Landhelgisgæslunnar. Það sé nauðsynlegur þáttur í veiðitímabilinu, fyrirbyggjandi og veitir ákveðið aðhald meðan á veiðum stendur.
Veiðimenn eru hvattir til að gera ferðaáætlun sem allir veiðifélagar vita af og líka þeir sem heima sitja. Þannig er hægt að kalla til hjálp ef veiðimaður skilar sér ekki á tilsettum tíma. 112 smáforritið fyrir snjallsíma er gagnlegt fyrir veiðimenn í því sambandi. Hægt er að sækja smáforritið á safetravel.is.