Í nótt áttu lögreglumenn leið um uppsveitir Árnessýslu og voru með fíkniefnahundinn Buster með sér. Þeir hleyptu hundinum út til að létta á sér en þá tók Buster á rás!
Um leið og hundurinn fór út úr lögreglubifreiðinni stefndi hann að nærliggjandi íbúðarhúsi og gaf sterka ábendingu að þar innandyra væru fíkniefni.
Lögreglumenn bönkuðu upp á og þegar húsráðandi kom til dyra leyndi sér ekki kannabisilmurinn sem barst út úr húsinu. Við leit í íbúðinni fundust tæplega 40 kannabisplöntur.
Lögreglan lagði hald á ræktunina og búnað auk þess var húsráðandi handtekinn og yfirheyrður. Hann viðurkenndi brot sitt.