Lögreglan á Selfossi handtók tvo karlmenn og eina konu um níuleytið í morgun vegna gruns um að hafa stolið tösku með fartölvu og spjaldtölvu að verðmæti um þrjúhundruð þúsund krónur.
Fólkið kom í morgun inn í verslun Samkaupa við Tryggvagötu á Selfossi þar sem sást til þeirra grípa töskuna og yfirgefa verslunina. Lögreglu var þegar í stað tilkynnt um atvikið.
Um leið og fólkið sá til lögreglubíls skiptist hópurinn upp og hver hljóp í sína átt. Karlmennirnir náðust en þeir voru ekki með þýfið. Skömmu síðar sáu lögreglumenn á ómerktum bíl til konunnar og óku upp að henni án þess að hún uggði að sér. Hún var gripin glóðvolg með tölvutöskuna. Þannig endurheimtust tölvurnar og komust óskemmdar í hendur eiganda síns.
Eftir handtöku fólksins fundust yfir tíu grömm af hvítu efni sem að líkindum er amfetamín.
Þremenningarnir gista fangageymslur á Selfossi og verða yfirheyrðir eftir hádegi. Annar karlmaðurinn var eftirlýstur þar sem hann á að taka út vararefsingu vegna óuppgerðar sektar.