Bæjarráð Árborgar skorar á Íbúðalánasjóð að koma því húsnæði sem er í eigu sjóðsins og stendur autt tafarlaust í íbúðarhæft ástand og í útleigu.
Staða mála varðandi íbúðir Íbúðalánasjóðs í Árborg var rædd á bæjarráðsfundi í morgun. Að undanförnu hefur verið vaxandi eftirspurn eftir húsnæði í sveitarfélaginu og samkvæmt upplýsingum bæjarráðs virðist sem þörfin hafi vaxið svo mikið að undanförnu að í óefni stefni hjá fjölda fólks.
„Færa má rök fyrir því að á annað hundrað fjölskyldur og einstaklingar séu nú í þörf fyrir leiguhúsnæði. Sérstaklega er mikil þörf og eftirspurn eftir traustri langtímaleigu á viðráðanlegum kjörum,“ segir í bókun bæjarráðs í morgun.
Meira en ár er síðan þingmenn Suðurkjördæmis áttu fund með framkvæmdastjóra og formanni stjórnar Íbúðalánasjóðs, þar sem lýst var þverpólitískum og afdráttarlausum vilja til þess að koma húsnæði sjóðsins í útleigu sem allra fyrst, hvort heldur væri í sölu til sjálfstæðra leigufélaga eða sem hluta af eigin leigufélagi sem stofnað í fyrra.
„Þar voru tekin af öll tvímæli um að það væri einnig hlutverk Íbúðalánasjóðs að leigja út húsnæði á sanngjörnu verði og stuðla með þeim hætti að auknu jafnvægi á húsnæðismarkaði þar sem mikill skortur ríkir á leiguhúsnæði,“ segir ennfremur í bókun bæjarráðs sem hvetur Íbúðalánasjóð til þess að ráða bót á þessum málum án tafar.
„Með því að koma íbúðunum á leigumarkað hið fyrsta er komið til móts við þá miklu eftirspurn sem er eftir húsnæði í sveitarfélaginu og snertir sérstaklega ungt og efnaminna fólk sem ekki er í stakk búið til að festa kaup á eigin húsnæði um þessar mundir.“