Lögreglan á Suðurlandi ítrekar við fólk að fylgjast vel með veðrinu í dag og á morgun. Um kl. 14 í dag mun Þjóðvegi 1 undir Eyjafjöllum verða lokað og verða vaktpóstar staðsettir á svokölluðum Kötluhliðum.
Eins mun verða sett upp lokun við Lómagnúp og austur undir Hof í Öræfum. Björgunarsveitir á Suðurlandi hafa verið settar í viðbragðsstöðu.
Lögreglan hvetur fólk til að vera ekki á ferðinni á meðan veðrið gengur yfir og ítrekar við ferðaþjónustaðila að koma þessum skilaboðum áfram til erlendra ferðamanna.
Hér að neðan fylgir uppfærð veðurspá frá Veðurstofunni kl. 10:50:
Nýjustu spár frá því í morgun gefa áfram til kynna að óveðurslægð að dýpt um 940 mb verði skammt suður af landinu síðdegis í dag. Miðju lægðarinnar er spáð austar en í gær og er nú búist við að hún verði 130 km suður af Kirkjubæjarklaustri kl. 18 í kvöld. Þetta þýðir það að vindur verður norðaustlægari og það er líklegast að Vestmannaeyjar sleppi við ofsaveðrið.
Búist er við stormi (meðalvindi yfir 20 m/s) á landinu síðdegis í dag og mestallan morgundaginn. Búist er við ofsaveðri (meðalvindi yfir 28 m/s) við Öræfajökul, Mýrdalsjökul og Eyjafjöll milli kl. 15 og 20 í dag.
Eftir hádegi fer vindur hratt vaxandi syðst á landinu og á Suðausturlandi. Búast má við vindhviðum milli 40 og 50 m/s undir Eyjafjöllum og Mýrdalsjökli, en hviður fara væntanlega yfir 50 m/s við Öræfajökul milli kl. 15 og 20. Úrkoma á þessum slóðum byrjar sem snjókoma, en færir sig yfir í slyddu/rigningu með tilheyrandi krapa á vegum. Þarna verður því ekkert ferðaveður síðdegis.
Annars staðar á landinu bætir einnig í vind síðdegis og undir kvöld verður víða orðið norðaustan hvassviðri eða stormur (15-23 m/s) með skafrenningi og síðar snjókomu þegar úrkomubakkinn færir sig norður yfir landið. Suðvesturland (þ.m.t. höfuðborgarsvæðið) sleppur best við veðrið, en þar verður samt orðið allhvasst undir kvöld með skafrenningi og dálítilli ofankomu um tíma.
Athygli er einnig vakin á því að á morgun, laugardag, er útlit fyrir norðan storm með stórhríð á norðanverðu landinu, en sunnanlands verða stöku él og skafrenningur.
Að lokum er útlit fyrir að lægi mikið á sunnudag og létti til, fyrst um landið vestanvert. Þá má búast við talsverðu frosti.