Sveitarfélagið Árborg og Gagnaveita Reykjavíkur hafa gert með sér samkomulag um ljósleiðaravæðingu alls þéttbýlis í Árborg. Skrifað var undir yfirlýsingu þess efnis í morgun.
Þau Ásta Stefánsdóttir, framkvæmdastjóri Sveitarfélagsins Árborgar og Erling Freyr Guðmundsson, framkvæmdastjóri GR, skrifuðu undir viljayfirlýsinguna en samkvæmt henni er stefnt að því að ljúka verkefninu fyrir árslok 2021.
Íbúar hafa áhrif á framkvæmdaröð
Íbúar geta haft áhrif á í hvaða röð eldri hverfi og byggðarkjarnar verða tengdir með því að lýsa yfir vilja til að tengjast Ljósleiðaranum. Samkomulagið nær til alls þéttbýlis í sveitarfélaginu, það er Selfoss, Stokkseyrar og Eyrarbakka.
Samhliða samkomulaginu við Árborg hefur Gagnaveita Reykjavíkur auglýst eftir samstarfsaðilum. Samstarfið getur meðal annars verið að selja GR fjarskiptalagnir sem fyrir eru í sveitarfélaginu og nýst geta við ljósleiðaravæðinguna, eða með samnýtingu framkvæmda með öðrum veitufyrirtækjum, fjarskiptafyrirtækjum eða sveitarfélaginu sjálfu.
Eitt gíg í boði
Með framkvæmdunum munu heimilum í þessum byggðakjörnum standa til boða eitt gíg gæðasamband Ljósleiðarans, sem gefur kost á 1000 megabitum til og frá heimili. Flest stærstu fjarskipta- og afþreyingarfyrirtæki landsins bjóða þjónustu sína um Ljósleiðarann og viðskiptavinum stendur til boða val á milli fjölmargra þjónustuleiða Vodafone, Nova, 365, Hringdu og Hringiðunnar.
Árborg kemst í fremstu röð
Ásta Stefánsdóttir framkvæmdastjóri Sveitarfélagsins Árborgar fagnar samkomulaginu um Ljósleiðarann. „Öflug fjarskiptatenging er orðin jafn sjálfsagður hlutur í nútíma sveitarfélagi og vatn, rafmagn og fráveita. Íbúum Árborgar fjölgar hratt og við erum ánægð með að fá Ljósleiðarann í hverja íbúð í bænum. Atvinnulíf verður hér líka samkeppnishæfara með bættum fjarskiptatengingum og við sjáum fram á gróskumikinn vöxt í sveitarfélaginu með því að þjónusta við íbúa og atvinnulíf eflist með tilkomu Ljósleiðarans. Árborg kemst í fremstu röð sveitarfélaga í þessu tilliti.“
Þessi tenging íbúa í sveitarfélaginu við opið net Ljósleiðarans styður við markmið stjórnvalda um ljósleiðaravæðingu alls Íslands. Verkefnið í þéttbýli Árborgar er alfarið á viðskiptalegum forsendum og ekki er sótt um ríkisstyrki vegna þess. Sveitarfélög eiga kost á að sækja um styrki til ríkisvaldsins til að tengja þá staði þar sem markaðsforsendur fyrir tengingu eru ekki fyrir hendi. Árborg hefur þegar sótt um slíkan styrk fyrir hluta af dreifbýli sveitarfélagsins og er áætlað að framkvæmdir vegna þess verkefnis fari af stað í sumar. Í framhaldinu verður sótt um styrk til lagningar ljósleiðara á þau svæði sem upp á vantar í dreifbýlinu.
Liggur vel við innviðum Gagnaveitunnar
„Þessi uppbygging í Árborg er hagkvæm viðbót við opið net Ljósleiðarans,“ segir Erling Freyr Guðmundsson, framkvæmdastjóri Gagnaveitu Reykjavíkur. Hann bendir á að íbúar í Ölfusi, Hveragerði, á Hellu og Hvolsvelli hafi nú þegar tengst Ljósleiðaranum. „Þessi uppbygging liggur því vel við okkar innviðum. Við vonumst líka til að gott samstarf náist með öðrum hugsanlegum framkvæmdaaðilum og það gæti enn aukið hagkvæmni þessa verkefnis,“ segir Erling. Nú þegar eru um 89 þúsund heimili tengd opnu neti Ljósleiðarans. Það eru um 65% allra heimila í landinu. Áætlað er að 4 þúsund heimili bætist við á þessu ári.