Þrýstingur hefur ekki minnkað í eldstöðinni

Mælingar á Fimmvörðuhálsi gefa til kynna að þrýstingur í eldsstöðinni hafi ekki minnkað og er því enn talin hætta á að gosið geti farið undir jökul. Þetta kom fram á fundi Almannavarnanefndar Rangárvallasýslu og Vestur-Skaftafellssýslu í dag með almannavarnadeild ríkislögreglustjóra og vísindamönnum.

Vegna þess verður áfram lokað inn í Þórsmörk en gos undir jökli getur kallað fram flóð sem fari þar niður. Af sömu ástæðu er umferð um Eyjafjallajökul bönnuð.

Umferð ökutækja upp Fimmvörðuháls er bönnuð vegna aurbleytu en sú leið verður opin fyrir göngufólk. Í tilkynningu frá Almannavörnum segir að fólk sem fer að gosstöðinni geri það á eigin ábyrgð og vakin er athygli á því að veður getur breyst hratt á þessu svæði.

Göngufólk er hvatt til þess að vera vel útbúið og ágætt að taka mið af leiðbeiningum sem Slysavarnafélagið Landsbjörg er með á heimasíðu sinni. Þeir sem fara gangandi upp Fimmvörðuháls geta skráð sig við Skóga áður en þeir leggja af stað.

Verið er að vinna að lagfæringum á veginum um Fljótshlíð að Fljótsdal til að auðvelda ferðafólki að komast á staðinn.

Þessar ákvarðanir verða endurskoðaðar daglega að teknu tilliti til upplýsinga frá vísindamönnum.