Þrír gistu fangageymslur á Selfossi

Athugull íbúi í Þorlákshöfn sá til jeppabifreiðar á róli um íbúðahverfi í bænum um klukkan hálf þrjú í nótt. Honum fannst þetta grunsamlegt og hafði samband við lögreglu sem brást við þegar í stað.

Lögreglumenn fundu jeppabifreiðina sem í voru tveir karlar og ein kona. Fólkið var handtekið og fært í fangageymslu á Selfossi.

Ökumaðurinn var grunaður um akstur undir áhrifum fíkniefna og við nánari skoðun á jeppanum kom í ljós að skráningarnúmerin sem á honum var tilheyrðu annarri bifreið. Rannsókn er í gangi með hvaða hætti skráninganúmerin voru komin á þessa bifreið og jafnframt hvort fólkið hefur staðið að lögbrotum á ferð sinni í nótt.

Í Þorlákshöfn hefur enn ekki verið tilkynnt um innbrot eða þjófnaði.

Þorgrímur Óli Sigurðsson, aðstoðaryfirlögregluþjónn, sagði í samtali við sunnlenska.is að lögreglan væri ánægð með að fólk fylgist vel með nágrenni sínu og láti lögreglu vita ef það verður vart við grunsamlegar mannaferðir um miðja nótt.