Þrefalt meiri framleiðsla en hjá íslenskum bændum

Geogreenhouse, sem áformar að reisa gróðurhús við Hellisheiðarvirkjun, mun í fyrsta áfanga framleiða 3.000-4.000 tonn af tómötum á ári.

Það er um þrefalt meira en íslenskir bændur framleiða í dag.

Öll framleiðslan verður flutt út til Bretlands, en Geogreenhouse er í samstarfi við erlendan aðila um sölu á framleiðslunni.

Viðræður standa nú yfir við hollenskan banka um að taka þátt í fjármögnun, en um er að ræða fjárfestingu upp á 2,4 milljarða króna í fyrsta áfanga. Þessi banki hefur tekið þátt í að fjármagna byggingu gróðurhúsa út um allan heim.

Í umfjöllun um þetta mál í Morgunblaðinu í dag segja Sigurður Kiernan og Sveinn Aðalsteinsson, stjórnendur Geogreenhouse, að mjög raunhæft sé að framleiða tómata á Íslandi og selja þá til Bretlands.