Ætla að opna 100 herbergja hótel

Stjórn Náttúrulækningafélags Íslands hefur samþykkt að sækja um leyfi fyrir hótelrekstri í húsakynnum Heilsustofnunar NLFÍ í Hveragerði.

Að sögn Inga Þórs Jónssonar, markaðsstjóra Heilsustofnunarinnar, er ætlunin að reka hótel þar í tvo mánuði í sumar en í ljósi niðurskurðar á fjárlögum var fyrirséð að hælinu yrði lokað í tvo mánuði.

Ætlunin er að reka hótelið frá 20. júní til 20. ágúst og verða 100 herbergi í boði á þessum tíma. Að sögn Inga Þórs verður boðið upp á gistingu, mat, baðaðstöðu og afþreyingu. Gert er ráð fyrir að stofna sérstakt rekstrarfélag utan um hótelreksturinn sem leigir aðstöðuna af NLFÍ.

“Það er mjög spennandi ef tekst að koma þessu í gang en við verðum varir við að það er mikil þörf eftir gistiplássi í kringum okkur,” sagði Ingi Þór í samtali við Sunnlenska.