Hveragerðisbær og Byggingafélag námsmanna ses. undirrituðu í dag viljayfirlýsingu um byggingu allt að 24 íbúða fyrir námsmenn við Gróðurmörk í Hveragerði.
„Uppbygging námsmannaíbúða í Hveragerði er stórt framfaraskref í byggðaþróun og búsetugæðum í bænum. Að geta boðið stúdentum húsnæði og framlengt þannig tíma þeirra í Hveragerði og átt möguleika á að nýta menntum þeirra síðar meir í bænum er mikilvægt lífsgæðaskref fyrir stúdenta og fjölskyldur þeirra. Uppbygging námsmannaíbúða í Hveragerði, þeim fyrstu á svæðinu, er vísir að bjartri framtíð bæjarins sem við getum verið stolt af,“ segir Pétur Markan bæjarstjóri Hveragerðisbæjar.
Uppbyggingin er í samræmi við deiliskipulag sem nú er í vinnslu en gert er ráð fyrir að íbúðirnar verði 2ja herbergja, u.þ.b. 60 fermetrar að meðtalinni sameign. Auk íbúðanna er ráðgert að byggður verði sameiginlegur þjónustukjarni með þvottaaðstöðu, hjóla- og vagnageymslu, ásamt lærdóms- og félagsrými fyrir íbúa nemendagarðanna.
Viljayfirlýsingin felur í sér að Hveragerðisbær lýsir vilja sínum til að úthluta Byggingafélagi námsmanna ses. lóð við Gróðurmörk undir uppbyggingu námsmannaíbúða í samræmi við framangreind áform ásamt því að leggja til stofnframlag til verkefnisins sbr. lög um almennar íbúðir, í formi niðurfellingar á lögbundnum gjöldum í samræmi við síðari samningagerð milli aðila.
Vaxandi áhugi fyrir íbúðum utan Reykjavíkur
Byggingarfélag námsmanna ses. hefur á síðustu árum byggt fjölda íbúða í Reykjavík og Hafnarfirði og hefur nú í rekstri tæplega 900 íbúðir sem leigðar eru til námsmanna. Byggingarfélagið þjónustar nemendur allra skóla á háskóla- og framhaldsskólastigi. Samkvæmt könnunum hefur áhugi fyrir námsmannaíbúðum utan Reykjavíkur færst stöðugt í vöxt með auknum möguleikum á fjarnámi.
Böðvar Jónsson, framkvæmdastjóri Byggingafélagsins, segist hlakka til að vinna að þessari uppbyggingu í góðu samstarfi við bæjaryfirvöld í Hveragerði.
„Fyrir þremur árum óskaði Byggingafélagið eftir samstarfi við nokkur sveitarfélög, á og í kringum höfuðborgarsvæðið, um uppbyggingu námsmannaíbúða. Hveragerðisbær tók, fyrst sveitarfélaga, forystu í því verkefni og hefur í góðu samstarfi við okkur, unnið að framgangi málsins. Það hlýtur að vera hagsmunamál allra sveitarfélaga að íbúar þeirra sem stunda nám og komnir eru á efri stig menntunar þurfi ekki endilega að flytja úr sveitarfélaginu sínu til þess að fá leigða nemendaíbúð á hagstæðum kjörum. Forystumenn Hveragerðisbæjar sáu þetta strax og fyrir það erum við hjá Byggingafélaginu afar þakklát,“ segir Böðvar.