Gulrótarnammi

FAGURGERÐI – MATUR // Þetta gulrótarnammi er stútfullt af vítamínum og hollri fitu.

Stóri kosturinn við þetta nammi er að það þarf engin brjáluð tæki eða tól til að búa það til. Ef þið eigið beittan hníf og skurðbretti, þá er það nóg 🙂

Hráefni:

  • Tæplega 1 bolli af pekanhnetum (lagðar í bleyti yfir nótt)
  • Sirka ¼ bolli af valhnetum (lagðar í bleyti yfir nótt)
  • ½ bolli döðlur
  • ½ bolli þurrkuð trönuber
  • 5 stk litlar gulrætur
  • 1 tsk alvöru lífræn vanilla (duft ekki dropar)
  • 2 tsk kanill
  • ½ tsk múskat
  • ½ tsk fínrifið engifer
  • Smá sjávarsalt
  • 1/3 bolli kókosmjöl
  • 1/3 bolli kókosolía, við stofuhita
  • 4 msk mjúkt möndlusmjör
Aðferð:
  1. Skolið hneturnar og þerrið (ég leyfði þeim að vera á eldhúspappír í sólarljósi í nokkrar klst – en það er ekki nauðsynlegt).
  2. Saxið hneturnar smátt niður (eða kurlið) og setjið í stóra skál.
  3. Saxið döðlurnar og trönuberin niður og setjið í skálina með hnetunum. Blandið vel saman með sleikju.
  4. Rífið niður gulræturnar og engiferið og setjið í skálina. Blandið vel saman með sleikju.
  5. Setjið vanilluna, kanilinn, múskatið, sjávarsaltið og kókosmjölið í skálina. Blandið vel saman með sleikju.
  6. Hellið kókosolíunni út í og hrærið vel saman með sleikju.
  7. Setjið möndlusmjörið í skálina og blandið vel saman með sleikju.
  8. Setjið bökunarpappír í kassalaga form. Hellið blöndunni í formið og dreifið úr. Gott að þjappa blöndunni betur niður í formið með sleikjunni eða bara gaffli.
  9. Notið hníf til að gera línur í deigið og mótið þannig stærðina sem þið viljið hafa á bitunum. Það er allt í lagi að línurnar nái ekki alveg niður – þetta er aðallega til þess að það sé auðveldara að skera nammið niður þegar það er tilbúið.
  10. Setjið formið inn í frysti og geymið í sirka klukkustund.
  11. Takið formið úr frystinum, skerið í bita, borðið og njótið!
  12. ATH. #1 Ef þið eruð búin að geyma nammið í frystinum í nokkra klukkutíma þá þarf það að fá að standa í smá stund á borðinu áður en þið borðið það. Þetta nammi er betra þegar það er ekki alveg gaddfreðið 🙂
ATH. #2 Það skiptir mjög miklu máli að þið notið mjúkt möndlusmjör annars er hætta á að það blandist deiginu ekki nógu vel.
ATH. #3 Þið megið auðvitað nota aðrar hnetur eða breyta hlutföllunum. Það er gott að miða við að hnetumagnið sé sirka 1 bolli í heildina.
ATH. #4 Ég mæli eindregið með því að þið notið ceylon kanil frekar en venjulegan kanil (cassia) – alltaf, ekki bara í þessari uppskrift. Ceylon kanill er mun hollari og betri fyrir okkur en hann inniheldur mun minna magn af efninu coumarin. Coumarin í miklu magni og í langan tíma getur verið hættulegt heilsu manna.
Til að fræðast meira um kanil þá mæli ég með þessari grein hér.
johanna@sunnlenska.is