Guðdómlegar mini pizzur (lágkolvetna)

FAGURGERÐI – MATUR // Þessar pizzur voru sérstaklega gerðar fyrir lágkolvetna vini mína.

Hráefni

  • 2 msk chiafræ, möluð
  • 1 ½ dl vatn
  • 250 gr möndlumjöl
  • 2 tsk oreganó
  • ½ tsk sjávarsalt
  • 1 msk næringarger

Aðferð:

  1. Byrjið á því að stilla bakaraofninn á 180°C (með blæstri).
  2. Blandið möluðu chiafræunum og vatninu saman og látið standa við stofuhita í amk 10 mín eða þar til þau eru orðin að þykku hlaupi.
  3. Setjið þurrefnin í skál og blandið vel saman.
  4. Setjið chiafræblönduna í skálina með þurrefnunum og blandið vel saman með sleikju – eða bara skeið.
  5. Setjið bökunarpappír á ofnplötu.
  6. Hnoðið deigið létt á borðinu og skiptið því fyrst í tvo helminga. Og svo aftur í tvo helminga eða þannig að þið eruð komin með fjórar litlar kúlur.
  7. Setjið kúlurnar á ofnplötuna og þrýstið með flötum lófa á hverja kúlu eða þannig að kúlurnar fletjist vel út. Gott er að móta hverja pizzu betur með fingrunum (og fletja í leiðinni betur út botninn/kúluna).
  8. Setjið ofnplötuna inn í ofn og bakið í 10 mínútur.
  9. Takið úr ofninum og setjið sósu og það álegg sem þið viljið. Á þessar pizzur setti ég: Spínat, sveppi, rauða papriku og rauðlauk + vegan mozzarella ost + smá svartur pipar yfir.
  10. Setjið plötuna aftur inn í ofn og bakið í sirka 12 mínútur.
  11. Takið úr ofninum og njótið!

ATH. #1 Ég hef bæði prófað að nota möndlumjöl frá NOW og Sólgæti og ég verð að segja eins og er að möndlumjölið frá Sólgæti er mun betra.

ATH. #2 Þið getið líka malað möndlur sjálf í blandaranum þannig að þær verða að mjöli (það er ódýrara).

ATH. #3 Það er algjör óþarfi að kaupa tilbúin möluð chiafræ. Það er mjög einfalt að mala chiafræin sjálfur í blandaranum. Passið bara að hafa blandarann ekki of lengi í gangi. Í Vitamixernum mínum tekur það bara örfáar sekúndur að mala fræin niður í duft.

ATH. #4 Þessar pizzur eru MJÖG saðsamar. Ég er algjört matargat en varð södd eftir 1 og ½ pizzu (ein pizza hefði meira að segja dugað mér).