Lagið Weekends með sunnlensku hljómsveitinni Kiriyama Family er efst á Árslista Rásar 2 fyrir árið 2012. Listinn var kynntur í dag og verður endurfluttur annað kvöld.
Ásgeir Trausti er í öðru sæti samantektarlistans með lagið Leyndarmál og í því þriðja er lagið Qween með Retro Stefson.
Kiriyama Family setti met á vinsældarlista Rásar 2 á þessu ári en Weekends náði því að vera samfellt á vinsældalistanum í nítján vikur. Lagið fór inn á listann í apríl síðastliðnum og var þar fram eftir ágústmánuði. Lagið sat meðal annars í toppsæti listans í þrjár vikur.
„Við erum frekar ánægðir með þessar fréttir, sveitastrákar með lag ársins, hah!“ sagði hljómsveitin í opinskáu viðtali við sunnlenska.is.