Unnur Birna og Jóhann Vignir með tónleika í kvöld

Í kvöld kl. 20 verða síðustu tónleikarnir í tónleikaröðinni sem verið hefur á kaffihúsinu Hendur í höfn í Þorlákshöfn í vetur.

Það eru skötuhjúin Unnur Birna Björnsdóttir og Jóhann Vignir Vilbergson sem ætla að skapa notalega stemningu með jólalögum í bland við sína eigin tónlist.

Þau eiga bæði ættir sínar að rekja á Suðurlandið en Jói er uppalinn á Eyrarbakka og steig sín fyrstu skref í tónlist með hljómsveitinni NilFisk en var síðan einnig meðlimur í hljómsveitinni Boogie Trouble og Kiriyama Family.

Foreldrar Unnar Birnu eru báðir frá Selfossi en faðir hennar er Bassi í Mánum. Unnur Birna er eini kvenkyns meðlimur Fjallabræðra þar sem hún spilar á fiðlu og syngur en auk þess hefur hún komið fram með fjölmörgum tónlistarmönnum þ.á.m. Frostrósum og Ian Anderson úr Jethro Tull, en hann spilar einmitt í laginu hennar, Sunshine, sem er í spilun þessa dagana. Hún lætur einnig að sér kveða á leiksviðinu, en Unnur Birna fer með hlutverk í sýningunni Jeppi á Fjalli sem sýnd er í Borgarleikhúsinu.

Unnur og Jóhann hafa sem sagt spilað lengi sitt í hvoru lagi en ákváðu að stofna dúett til að hemja alla sköpunargleðina sem á sér stað innan veggja heimilisins.

Miðaverð á tónleikana er 1.500 kr.

Að venju verður hægt að panta sér veitingar hjá Dagný en þessa dagana eru þær með sérstaklega hátíðlegu yfirbragði og kaffihúsið sjálft í sannkölluð um jólabúning. Nánari upplýsingar um matseðilinn er að finna hér.