Síðasti hluti ML-dagsins í gær var söngkeppnin Blítt og létt. Þar fór Magdalena Katrín Sveinsdóttir frá Selfossi með sigur af hólmi.
Það voru þrettán atriði sem kepptu um Hljóðkútinn þessu sinni. Magdalena Katrín söng lag Ninu Simone: Feeling good, á einstaklega sannfærandi hátt og verður hún fulltrúi skólans í söngkeppni framhaldsskólanna.
Í öðru sæti varð Unnur Þöll Benediktsdóttir frá Hvolsvelli sem söng Frostrósir Vilhjálms Vilhjálmssonar og í því þriðja Birgitta Rún Baldursdóttir frá Rifi en hún söng lag Alicia Keys, Falling. Helgi Jónsson frá Selási var verðlaunaður fyrir besta sviðsframkomu þegar hann söng lagið Paradís sem Júdas gerði frægt.
ML-ingahljómsveitin Stone Stones annaðist undirleikinn af einstakri fagmennsku og lék þar að auki eigin tónlist í hléum.
Kynnarnir, sem komu úr hópi svokallaðra fimmtubekkinga, þær Bára Jónsdóttir og Sigrún Aagot Ottósdóttir ræktu hlutverk sitt af prýði.
Það var góður heildarsvipur á kvöldinu og ljóst að metnaður réði för í umgjörð og framkvæmd.