Hljómsveitin Hellvar er nýkomin heim eftir vel heppnað tónleikaferðalag um England. Hellvar lék á tíu tónleikum, meðal annars í London, Cambridge og Northampton.
Hljómsveitin vinnur nú að næstu breiðskífu sinni en þrjú ár eru síðan sveitin gaf út plötuna Stop That Noise.
„Stop that Noise er auðvitað orðin þriggja ára, en í eyrum Breta er þetta ný plata þannig að við fengum splunkunýja sýn á lögin og þau fengu sum hver nýjan búning. Það var gaman,“ segir Selfyssingurinn Elvar Sævarsson, gítarleikari Hellvar, þreyttur en glaður í samtali við Víkurfréttir.
„Það má segja að við höfum laumað okkur bakdyramegin inn í tónleikasenuna sem hverfist um Northampton, því bókarinn var Breti sem búsettur var á því svæði. Við nutum samt ákveðinnar sérstöðu innar þeirrar senu sem íslensk hljómsveit, og ferðin gekk því vel, við seldum boli og diska og stóðum undir kostnaði. Við förum pottþétt aftur út enda eru nokkur boð búin að berast nú þegar frá festivölum á svæðinu,“ sagði Elvar ennfremur.