Föstudaginn 7. ágúst nk. mun Gunnar Þórðarson mæta með fimm manna hljómsveit ásamt söngvurunum Stefáni Jakobssyni og Unu Stefánsdóttur og flytja „Bestu lög Gunnars Þórðarsonar“ á bæjarhátíðinni Sumar á Selfossi.
Tónleikarnir verða í hátíðartjaldinu í Sigtúnsgarðinum milli 21:00 og 23:00.
Gunnar Þórðarson er landsmönnum vel þekktur enda einn fremsti tónlistarmaður þjóðarinnar og tónlistarperlur hans óteljandi. Fetar Gunnar Þóðarson í hóp annarra glæsilegra tónlistarmanna sem fyllt hafa hátíðartjaldið í Sigtúnsgarðinum undanfarin ár.
Guðjón Bjarni Hálfdánarson, framkvæmdastjóri hátíðarinnar lét hafa það eftir sér að hann væri virkilega ánægður að geta boðið upp á svona glæsilega tónleika fyrir íbúa Árborgarsvæðisins.
„Þetta eru tónleikar sem þörf hefur verið á og gerum við ráð fyrir að mikil eftirsókn verði í miða á þessa tónleika, en uppselt hefur verið á föstudagstónleikana síðustu ár,“ sagði Guðjón Bjarni.